Esta fin de semana vaise celebrar na nosa comarca un dos máis grandes acontecementos deportivos da tempada en Galicia: a XI edición de Os 100 do Barbanza. Será este sábado 22 e domingo 23. Trátase dunha andaina ultratrail organizada polo Club Deportivo Internacional Trekkers Barbanza Sar de 100 quilómetros de distancia que percorre todos os concellos do Barbanza máis os limítrofes da comarca do Sar: Padrón, Rois, Dodro, Rianxo, Boiro, A Pobra do Caramiñal, Lousame, Ribeira e Porto do Son.
Os 100 dos Internacional Trekkers do Barbanza terá este ano como punto de partida e de chegada o municipio rianxeiro (con Catoira como concello convidado). A proba está organizada polo club ITBS e polos Concellos de Rianxo, Lousame, Noia, Porto do Son, Ribeira, A Pobra do Caramiñal e Boiro, xunto coa Mancomunidade Barbanza Arousa e o Concello de Catoira, que será o municipio convidado desta convocatoria (con especial protagonismo das Torres do Oeste). Pasará por todos os devanditos territorios.
Os 100 do Barbanza é unha proba de trail de 100 quilómetros que se realiza en 24 horas e que forma parte da Liga de Sendeirismo de Galicia e da Liga Ibérica. Vén novamente nesta edición con dous formatos de andaina e ultratrail. Desenvolverase entre o 22 e o 23 de xuño.
