A Asociación Cultural Barbantia organiza esta vindeira semana, o venres 28 de xuño, a presentación dun libro que pon o foco e recupera unha parte esquecida do noso patrimonio artístico e simbólico: as múltiples e variadas representacións de animais que están presentes en boa parte das manifestacións artísticas dos pasados séculos, nas marxes dos manuscritos, na escultura decorativa, nos capiteis, nas cornixas e gárgolas e nos cadeirados de coro.
Estamos a falar do libro Bestiario en Pedra. Animais fabulosos na arte medieval galega (editado por Laiovento), obra de Carlos L. Bernárdez e Xosé Ramón Mariño Ferro.
Presentarase o vindeiro venres 28 de xuño, ás 20,30 h, na sala 2 do Museo do Gravado, Lugar de Outeiro 52, Artes, Ribeira. Intervirán Carlos L. Bernárdez (autor), Xosé Ramón Mariño Ferro (autor), Xoán Pastor Rodríguez Santamaría (director do Museo do Gravado), María Xesús Blanco (presidenta da A. C. Barbantia e Luís A. Pérez Barral (presidente da FMAG e alcalde de Ribeira).
Ficha do libro
Os temas e motivos simbólicos dos animais fabulosos, con paralelos en Europa, presentan en Galiza unha riqueza e unha variedade verdadeiramente extraordinarias. Destacan os conxuntos das catedrais de Santiago e Ourense, da igrexa e do espectacular claustro de San Francisco de Ourense, das igrexas betanceiras, das de Ribadavia e desa xoia que se chama Santiago de Breixa…
Os autores recollen na arte do noso país os exemplos de anfisbenas, basiliscos, bestas apocalípticas, centauros, dragóns, grifóns, harpías, sereas ave e sereas peixe e proporcionan un vasto repertorio de textos antigos e medievais e unha interpretación que permite comprender a súa omnipresenza nas nosas catedrais e igrexas.
