Axentes da Policía Nacional adscritos á Comisaría de Ribeira, procederon esta pasada fin de semana á detención de dous suxeitos no porto de Ribeira, como presuntos autores dun delito contra a saúde pública, na súa modalidade de tráfico de drogas.
Os feitos encadráronse nun dispositivo establecido para a prevención do tráfico de drogas na localidade de Ribeira, ao abeiro do cal os axentes cominaron a un condutor a que detivera o seu vehículo ao seu paso pola contorna portuaria, momento no que o copiloto lanzou polo portelo un bolso tipo alxibeira (riñoneira), que foi dar ao mar.
Os policías nacionais, grazas á axuda dun mariñeiro que estaba na zona, puideron recuperar do mar o bolso guindado, que contiña cinco botes con substancia estupefaciente en forma de pequenas rocas e papelinas preparadas para a súa venda. Ademais, unha vez realizado un rexistro minucioso do vehículo, foron achadas nun lugar recóndito varias papelinas de droga. En total interviñéronse 10 gramos de cocaína e outras pequenas cantidades de heroína e haxix.
Axentes da Policía Local de Ribeira apoiaron na intervención trasladando o vehículo dos detidos a dependencias policiais.
Tras tramitarse as correspondentes dilixencias policiais, os detidos foron postos ao dispor do Xulgado de Instrución de Ribeira, en funcións de garda.
