A Sociedade Cooperativa Galega do Mar Santa Uxía de Ribeira (OPP83) viaxará a Silleda para participar no 27o Salón de Alimentación do Atlántico, SALIMAT Abanca 2024. A OPP83 realizará unha degustación para os asistentes na que dará conta das excelencias do xurelo e o Lirio de Ribeira. O evento levarase a cabo nas instalacións habilitadas para a Consellería do Mar, no marco da campaña Galicia Sabe aMar (Pavillón 1, caseta C2).
A organización detallará aos presentes os beneficios do consumo de peixe dos barcos integrados na Cooperativa e realizará unha cata de xurelo e lirio para demostrar a versatilidade destes alimentos á hora de incorporalos a unha dieta rica e saudábel. A elaboración dos pratos irá a cargo da chef Emma Pinal, de Gastrobar O Birrán, e contará coa maridaxe dos viños D.O. Ribeira Sacra.
O lirio de Ribeira é unha marca colectiva da OPP83 recoñecida pola Oficina Española de Patentes e Marcas. O seu valor radica principalmente no seu grao máximo de calidade e frescura, xa que se trata dun peixe capturado no día mediante artes de arrastre tradicionais e selectivas, desenvolvendo prácticas de pesca sostíbeis e respectuosas co medio mariño.
A acción promocional forma parte do Plan de Produción e Comercialización 2024 (PPyC), co-financiado polo Fondo Europeo Marítimo, de Pesca e de Acuicultura (FEMPA) e da Xunta de Galicia.
Cando: venres 31 de maio
Horario: de 13.15 a 14.15h. Durante ese horario farase unha degustación de xurelo e lirio de Ribeira e repartiranse folletos informativos sobre a OPP83 e o peixe capturado pola frota asociada
Lugar: Pavillón 1, stand C2 (na Aula de Catas da Consellería do Mar no marco da campaña Galicia Sabe aMar).
Asistirá María José Casais Boo, xerente da OPP83 (Sociedade Cooperativa Galega do Mar Santa Uxía de Ribeira).
