O Conservatorio Profesional Felipe Paz Carbajal organiza este mes de maio un evento cultural que tira proveito da sempre estimulante confluencia entre cinema e música. Estamos a falar da actividade Concerto de Película, na que máis de 100 músicos interpretarán bandas sonoras de películas coñecidas por todas e todos as/os seareiros do sétimo arte, e mesmo polos non tan seareiros.
A praza do Tapal será o escenario deste concerto no que, ademais, proxectaranse imaxes na fachada da igrexa de San Martiño. Segundo informaron na presentación do evento os organizadores, contarase coa presenza da Banda Isabel II de Touro e a S.R. San Xoán de Calo. A cita será o vindeiro xoves 16 de maio a partir das 22.30 horas.
