O Concello do Son quere licitar o proxecto do novo colexio de Portosín despois do remate do verán

22 Maio 2024

O Concello de Porto Son informou de que está a levar a cabo diversos encontros e trámites para acelerar o proxecto de construción do novo colexio de Portosín. O obxectivo, segundo fixo saber o rexedor Luis Oujo, é contar coa superficie necesaria para construír antes de que remate o verán, deixando vía libre para a licitación do proxecto.

Entre as xuntanzas mantidas polo alcalde figura unha xornada de traballo co conselleiro de Educación, Román Rodríguez, na que se abordou, precisamente, a necesidade de contar cos terreos precisos ao remate do verán. Neste senso, o Concello fixo saber que neste intre estanse a levar a cabo as negociacións para a compra dos predios, vía que se vai complementar, se nada o impide, coa expropiación dalgúns destes terreos.

O centro docente proxectado contaría cunha área dispoñíbel de máis de 6.600 metros cadrados, dos que a edificación en si mesma ocupará 2.666 metros cadrados, complementándose con trinta prazas de estacionamento interior. Disporá de dous andares, con tres unidades de Infantil e seis de Primaria, amais de comedor, pista cuberta, ximnasio, biblioteca e outras estancias. Amais, a nivel de deseño e construción, o inmóbel que substituirá ao edificio emprazado durante anos a carón da praia de Coira será o segundo da nosa Comunidade construído integramente segundo o Plan de Nova Arquitectura Pedagóxica (tras o novo colexio de Milladoiro, Ames), a folla de ruta do Goberno galego para o deseño dos centros educativos post-COVID, un modelo que aposta de cheo pola amplitude de espazos, a integración na contorna, a accesibilidade e a versatilidade (veñen preparados para dar resposta ás necesidades do ensino das vindeiras décadas). Dará resposta a unha poboación escolar de 900 alumnas e alumnos.

Outros artigos

Publicidade

Revista en papel

Opinión

“Eurocopa”. Xulio Xiz

“Eurocopa”. Xulio Xiz

Noto o peso dos anos, máis ca fisicamente nas continuas referencias a tempos idos. E non porque xeneralice a bondade do pasado, que moito habería que matizar, senón porque o paso do tempo me vai permitindo comparar situacións que me parecen aberrantes. O deporte –...