O Concello de Boiro traballa no acondicionamento dos areais do municipio de cara á época estival. As actuacións que se están a levar a cabo teñen como finalidade a renovación e mellora dos servizos de praias logo da época de temporais.
As brigadas de obras están a realizar os arranxos e reparacións no mobiliario das praias tales como bancos, papeleiras ou pasarelas, así como a posta a punto dos accesos ás mesmas. Do mesmo xeito, estase a traballar na limpeza e roza das contornas así como o acondicionamento dos sendeiros e camiños de acceso.
Ademais destas tarefas previas de acondicionamento dos servizos, o Concello de Boiro vai levar a cabo, como cada verán, a limpeza mecánica e manual das praias para eliminar os residuos traídos polo mar e depositados na superficie areosa. Para este fin, contrataranse un total de quince persoas mediante unha subvención da Deputación da Coruña.
