O venres 17 de maio, Día das Letras Galegas, a vila de Noia celebrou a nosa cultura facendo a tradicional homenaxe aos escritores locais (distinguidos en pasadas edicións do 17 de maio) Antón Avilés de Taramancos e María Mariño, a carón de cadanseu busto na Alameda. Nos actos, celebrados ao mediodía, participaron membros do Goberno e da Corporación local (por exemplo o alcalde Santiago Freire e o concelleiro de Cultura Pepe Pérez), ademais de familiares dos poetas homenaxeados, amigos e veciños.
Ás 12.15 horas foi a quenda dunha intervención teatralizada a cargo de Serafín Marcos: Historia da palabra.
Os actos polas Letras Galegas proseguirán ao longo do mes de maio e mesmo xa entrados en xuño.
O venres 24 presentarase o libro El despertar de los clones, de José Manuel Castro, ás 20.30 horas na Casa da Cultura.
O domingo 26 de maio o Teatro Coliseo Noela acollerá o espectáculo Musicalizando, a partir das 18.30 horas. O sábado 1 de xuño representarase a peza teatral Escenas de aquí e de acolá! de Lúa Chea, no Coliseo Noela, a partir das 20.00 horas. O venres 7 de xuño ás 20.30h presentaranse os libros Marea (novela) e 5 (poemas) da escritora da nosa comarca Ana Lojo, na Casa da Cultura.
O 8 de xuño ás 20.30 horas haberá poesía no Coliseo Noela, da man de Jorge Gallardo, que presenta Poesía viva.
