O Concello de Boiro recibiu da Deputación da Coruña unha subvención por importe de 18.000 euros para o mantemento e reforzo dos servizos de normalización lingüística durante o ano 2024. A axuda concedida vaise destinar a co-financiar os gastos do persoal técnico do servizo de promoción do galego municipal.
O Servizo de Normalización Lingüística do Concello de Boiro foi creado no ano 1993 tratando de fomentar o uso da nosa lingua en todos os eidos municipais, non só no plano administrativo senón no conxunto da sociedade. “O servizo desempeña unha función normalizadora e dinamizadora da lingua para impulsar o galego na vida pública e sociocultural da vila”, en palabras do Concello, que engade que o persoal do departamento traballa tanto a nivel interno como externo (realizando asesoramento aos compañeiros e compañeiras dos distintos departamentos co obxectivo de asegurar o uso do galego na administración e, a nivel externo, organizando ao longo do ano diversas actividades para promover o seu uso no ámbito educativo, empresarial, asociativo…).
Entre as actividades que se desenvolven ao longo do ano dende o Concello de Boiro para fomentar o uso do galego están todas as actividades relacionadas coas Letras Galegas, o Día de Rosalía, exposicións e concertos, o I Certame de Regueifas cos centros de ensino do municipio, a mostra de teatro escolar ou o programa de cinema familiar.
