O concelleiro de Deportes de Ribeira, Xabier Vidal, presentou este 21 de maio xunto a Chento Dominguez a III Palmeira Cup Futevolei que se celebrará o vindeiro sábado 1 de xuño na praia da Corna en Palmeira. Segundo sinalaron, o evento está organizado polo Clube de Futevolei de Vigo, co adestrador Ramón Pérez e o presidente Diego Ferreira, en colaboración coa concellería de Deportes de Ribeira.
Ramón Pérez engadiu que na primeira edición contaron con 16 participantes, 28 na segunda e “agora xa temos 33 inscritos”.
O prazo de inscricións está aberto ata o 25 de maio e poderanse realizar a través das redes sociais de Futevolei Vigo, cunha cota de 10 euros coa que se pretende costear o prezo da comida, xa que ao remate do torneo celebrarase unha churrascada.
Pérez tamén explicou algunhas das características da práctica do futevolei, “que é semellante ao volei praia, pero non se poden empregar as mans, tendo igualmente tres toques alternos para poder pasar o balón ao outro lado da rede”.
“O noso propósito é visibilizar esta disciplina e achegar a tódalas parroquias distintas actividades deportivas para que a xente poida introducirse neste deporte.” afirmou Xabier Vidal.
