A patronal boirense (ABE) lanzou este xoves 9 de maio a súa nova campaña para dinamizar o comercio e a cultura locais. Fíxoo baixo o lema O pequeno fainos grandes e co obxectivo de achegala o máximo posíbel ao día a día da veciñanza. Os protagonistas da campaña son os 9 traballos gañadores do I Concurso de carteis escolares Somos Boiro no que participaron os centros de ensino da localidade.
Como explicou na presentación da campaña o presidente da ABE, Daniel García, “os carteis protagonistas que estarán visíbeis en formato físico nos farois do pobo en forma de pancarta e nos tótems das rúas peonís promoven as vantaxes do consumo local a través de 9 lemas que foron ideados polos alumnos.”
A maiores elaboráronse dúas pancartas xigantes de 16 metros cadrados que estarán situadas na fachada da Praza de Abastos, en pleno centro da localidade onde aparecen os 9 carteis.
O lema da campaña #Opequenofainosgrandes explicou García “é unha alusión aos negocios locais e a importancia que teñen no ecosistema dunha localidade e por outra a importancia de que os nenos e nenas coñezan as implicación que ten o consumo local e esta circunstancia vese perfectamente reflectida nos lemas que idearon para os seus debuxos”.
A campaña a física irá acompañada dunha campaña de mercadotecnia dixital onde a ABE irá dando a coñecer cada un dos carteis e o seu lema correspondente.
Complemento: votación, premios e sorteos
Ademais os clientes dos negocios asociados poden elixir o seu cartel favorito accedendo á web da ABE (www.abe.gal) e votando no formulario habilitado entre o 9 de maio e o 16 de xuño. Entre todos os participantes sortearanse 3 Packs Verán compostos por Esterilla XL, Neceser, Palas, Frisbie, Crema Solar, Balón, Botella e Bolsa que serán os mesmos premios que tamén se levarán os 3 carteis mais votados.
Os negocios asociados contan con carteis informativos da campaña onde aparecen os 9 carteis gañadores e un código QR para poder votar ao igual que nos tótems colocados nas rúas peonís.
En paralelo a ABE pon en marcha un sorteo especial vinculado a campaña entre todos os tíckets de compra rexistrados entre o 9 de maio e o 16 de xuño na web da asociación entre os que sortearanse outros 3 packs verán.
A campaña conta co financiamento da Xunta de Galicia e a colaboración do concello de Boiro.
