O alcalde de Rianxo, Julián Bustelo, anunciou este luns 16 de abril novidades no transporte do concello que mellorarán o servizo a cidadáns e visitantes. En concreto, deu a coñecer a adxudicación de catro novas licenzas de taxi.
Segundo dixo, dos novos vehículos de transporte público que axiña comezarán a traballar no municipio, un será un vehículo adaptado a persoas con mobilidade reducida e dous deles contarán con sete prazas.
Bustelo engadiu que estamos ante un “importante paso no camiño de reactivar a pequena economía local e atende á demanda manifestada dende fai moito tempo tanto polo propio sector como polos veciños e veciñas”. E engadiu: “Os novos taxis, xunto cos xa operativos, permitirán fortalecer o servizo tanto para os veciños e veciñas de Rianxo como para as persoas que nos visitan”.
