O Concello de Rianxo, a través da Concellería de Medio Ambiente que dirixe Alberto Angueira, bota a andar unha campaña de prevención de lumes no municipio. Tal e como explicou o edil, os esforzos centraranse no control da limpeza das fincas situadas nas franxas de protección, as cales deberán estar limpas antes do 31 de maio, tal e como marca a Lei de Prevención de Incendios Forestais de Galicia. “Todos os propietarios e propietarias de parcelas situadas a menos de 50 metros de poboacións están obrigados a limpalas antes desa data”, sinalou o concelleiro.
Nos próximos días enviaranse notificacións e colocaranse, nos puntos habituais, bandos informativos para difundir as obrigacións das persoas propietarias das fincas, así como planos dos diferentes núcleos coas franxas de protección delimitadas, as cales tamén aparecen recollidas no visor xeográfico da Xunta.
