O vindeiro xoves 18 de abril, ás 20:30, no Salón de Actos do Centro Sociocultural-Auditorio, está prevista a presentación da obra Los cuadernos perdidos de Robert Walser, do poeta arxentino, con antecedentes rianxeiros, Diego Roel.
A obra, editada polo prestixioso selo Visor e galardoada co Premio Loewe de Poesía 2023, (un dos certames máis relevantes do ámbito iberoamericano) presentarase na terra de orixe de Roel no marco programa Primavera Cultural 2024, organizado pola Área de Educación e Cultura do Concello de Rianxo.
A cita contará coa presenza do autor e do tamén escritor (e rianxeiro) Xosé Ricardo Losada, e do alcalde Julián Bustelo.
Diego Roel é un dos poetas arxentinos máis valorados e recoñecidos no seu país na actualidade. Nado en Temperley, Bos Aires, en 1980, estudou Historia da Arte na Universidade da Prata e actualmente dita obradoiros de escritura creativa en Posadas. Entre os seus libros destacan Padre Tótem (2004), Dice Jonás (2015), Las intemperies do mar (2017), Shibólet (2018), Kadosh (2019), El inferno es una bestia callada y triste (2020) e Andréi Rubliov (2020).
Os cadernos perdidos de Robert Walser é un libro que utiliza a técnica do monólogo dramático, mesturado co monólogo interior, usando como fonador a personalidade do escritor suízo citado no título, así como diversas referencias a Hölderlin, Keats e Rimbaud, que lle permiten ao autor combinar a epístola e o pensamento, a confidencia e a reflexión, mantendo unha distancia enunciatoria que obxectiva o subxectivo e que articula todo o seu sistema de dicción.
En palabras de Vistor, o resultado “é un libro que destaca polo rigor e a unidade da súa escritura, o ton conseguido e unha serenidade sen o menor indicio de traxedia”.
