A Casa da Cultura de Boiro acolle dende este mércores unha exposición con todos os traballos presentados no I Concurso de Carteis Escolares “Somos Boiro” organizada pola Asociación Boirense de Empresarios para realizar a súa nova campaña de promoción comercial. O alcalde, José Ramón Romero, e a concelleira de Ensino, Carmen Silva, participaron esta tarde xunto co presidente da ABE, Daniel García, na inauguración da mostra e entrega de premios aos traballos gañadores.
De todos os traballos presentados polo alumnado dos centros de ensino do municipio, seleccionáronse 9 debuxos que serán os
protagonistas da campaña de promoción do comercio local da ABE na primavera 2024 e que consistirá na colocación de 45 pancartas e 2 lonas na rúa peonil de Boiro. O alcalde, José Ramón Romero, agradeceu a todos os rapaces e rapazas pola súa “participación nesta iniciativa que engloba aos centros de ensino, ao empresariado local e ás familias para promover o
comercio local”.
“Os traballos seleccionados van ser os protagonistas da nova campaña comercial e de promoción do comercio local para facer participe á rapazada de Boiro da importancia de mercar no noso comercio”, afirmou Daniel García.
Os 8 galardoados recibiron ademais un BONO ABE valorado en 30 euros para empregar nos máis de 200 negocios asociados.
Ante a gran calidade dos traballos presentados, decidiuse organizar unha exposición coa selección dos mellores traballos presentados e que, dende hoxe, se poden visitar na Casa da Cultura de Boiro. “É un proxecto moi gratificante, que tivo unha ampla participación e contou coa colaboración de todos os centros de ensino”, afirmou a concelleira de Ensino, Carmen Silva.
