A praza García Martí da Pobra do Caramiñal será escenario no 5 de abril, ás 19.00 horas, da ofrenda cívica ante o busto do intelectual ao abeiro da programación do V Ciclo Victoriano García Martí. Ao acto asistirán membros da Corporación municipal baixo a presidencia do alcalde, José Carlos Vidal, e da concelleira da Cultura, Partricia Lojo.
O ciclo
O Concello da Pobra do Caramiñal renovou este mes de abril o seu compromiso cun dos seus veciños máis ilustres, o escritor e xornalista Victoriano García Martí, representante da intelectualidade libre pensadora da primeira metade do século XX, amais de autor prolífico e promotor da galeguidade alí onde tivese foro de opinión pública ou responsabilidades.
Así, a Concellaría de Cultura a través do Museo Valle-Inclán, a institución depositaria dos fondos manuscritos, bibliográficos e fotográficos cedidos pola familia de García Martí, achega esta primeira fin de semana de abril unha serie de actividades de índole conmemorativa.
O venres, 5 de abril, o grupo de música tradicional Os Caraveiros percorrerá as prazas e rúas da vila durante a tarde. Ás 19:00 h celebrarase a dita a ofrenda cívica no busto de don Victoriano situado na praza que lembra o seu nome e, de seguido, ás 19:30 h inaugurarase a mostra Memorias admirables do ‘El Duque de Él’, escolma de imaxes e de citas en admiración súa de persoeiros da cultura de Galicia, da que é comisario Antonio González Millán.
O sábado, 6 de abril, e xa no auditorio do museo, ás 19: 00 h, será a ocasión dunha lectura pública de textos do autor sobre A Pobra do Caramiñal e, ás 19:30 h, da presentación da novela ¡Una más!…» (1932), edición facsimilar, coa intervención do profesor e crítico literario Xesús Laíño Briones-Arén. Publicación da que as persoas asistentes recibirán un exemplar de balde.
