A reforma integral do Centro Sociocultural da Ribeiriña rematada a finais do 2023 complementarase este ano cunha importante intervención: a rexeneración paisaxística da contorna do edificio, unha transformación sustentábel programada con técnicas respectuosas co medio ambiente cuxos detalles foron presentados este venres 5 de abril polo Concello, que explicou que a fórmula elixida é a dun xardín veciñal colaborativo. O proxecto vén da man da Concellaría da Participación Veciñal da Pobra do Caramiñal xunto con Agrofloresta Viva, a Asociación de veciños Ribeiriña-Conchido e Senda Verde.
A concelleira da Participación Veciñal, Rosana Pérez, sinalou este venres que “se trata dunha iniciativa viva e dinámica coa vontade de crear espírito de comunidade mediante a co-creación dunha zona axardinada”. Desta maneira, engadiu, “búscase a implicación da cidadanía e a descentralización das actividades lúdico-formativas do núcleo urbano para levalas ao rural”. Por esta razón, a edil animou a residentes do centro a “participar para aprender sobre xardinería e experimentar a creación dun espazo verde”.
O investimento por parte da Administración local ascende aos 8.000 euros.
No acto de presentación tamén estiveron presentes a edil da Promoción Económica, Amparo Cerecedo, e representantes de Agrofloresta Viva, nomeadamente Rubén Escuredo, Ana de Diego e Sergio García, quen explicaron que esta acción enmárcase na permacultura: unha forma de deseño de espazos sustentábeis. “Esta actividade retroalimentarase das propostas das persoas participantes, polo que irá evolucionando segundo os intereses e suxestións”, sinalaron, engadindo que a fase de implantación desenvolverase nos días 20 de abril e 4 e 5 de maio. O horario das dúas primeiras xornadas é de 10.00 a 14.00 e de 16.00 a 19.00 horas, mentres que a derradeira será a partir das 10.00 horas. A programación inclúe unha introdución á xardinaría rexenerativa; o deseño e creación do xardín veciñal; a selección de plantas adaptadas, perennes e multifuncionais; biopreparados e compostaxe para horta e xardín; círculo de saberes e tradicións; plantación e acolchado, deseño participativo de próximas actividades e xantar compartido. Tamén haberá mantemento durante todo o ano.
Máis información e inscricións no enderezo electrónico participacionvecinhal@gmail.com.
