O concello de Porto do Son promete ser esta tempada un fervedoiro de opcións deportivas e de lecer. Para exercitar e acondicionar corpo e mente, a ADC Arnela e o Concello achegaron un completo calendario de actividades de orientación deportiva. “Queremos que nova xente poida acceder a este deporte, para compartir coa familia unha xornada de diversión e actividade física”, informaron dende a organización, engadindo que a primeira cita será na contorna da parroquia de Nebra, o vindeiro 12 de maio.
A organización achega a seguinte listaxe de citas deportivas.
12 Maio – Montes de Nebra (en bicicleta ou correndo)
23 Xuño – Portosín (correndo)
1 Setembro – Monte Cabeiro (andando ou correndo)
20 Outubro – Monte Enxa (correndo)
7 Decembro – Porto do Son (correndo)
28 Decembro – Porto do Son (correndo)
Inscricións e información na web da ADC Arnela e máis no Facebook da asociación.
Para quen non o saiba, o deporte de orientación é unha actividade que combina a práctica física coa navegación en plena natureza. Consiste en que cada participante, coa axuda dun mapa e un compás, tense que orientar por camiños descoñecidos ata atopar, nunha orde determinada, os puntos de control que se marcaron sobre o terreo. O reto deberá facerse no menor tempo posíbel. Estes puntos de control poden ser balizas ou estar marcados de forma electrónica e adoitan situarse en zonas de difícil acceso.
