
O Bloque Nacionalista Galego fixo públicas as alegacións presentadas ao Real Decreto polo que se regula a produción de enerxía eléctrica en instalacións que se implantarían no mar. O deputado Néstor Rego anunciou que, como cuestión previa, o BNG reclamou de novo formalmente ao Goberno do Estado que retire os Plan de Ordenación do Espazo Mariño e a posibilidade de que se implanten parques de eólica na costa galega. O deputado do BNG sinalou que “nas alegacións pídese que se respecten as competencias propias das Comunidades Autónomas, que se garanta que parte da xestión sexa pública e reverta no público e, entre outras, a consecución da implantación dunha Tarifa Eléctrica Galega”.
Rego lembrou a presentación dunha consideración previa pedindo a retirada do Real Decreto en aplicación ao principio de precaución debido a que “non existe suficiente información do grao de afectación dos parques de eólica mariña sobre os ecosistemas e sobre a pesca”. O que si existe, proseguiu, “é a experiencia empírica previa coa instalación de tres muíños en Viana do Castelo (Portugal) onde os pecadores afirman que, nun radio de quilómetros, desapareceu a actividade pesqueira”.
Por este motivo, o BNG urxe a retirada dos POEM para “eliminar a posibilidade de implantar os polígonos industriais de xeración de enerxía eléctrica na costa galega”. Da mesma maneira, Néstor Rego expresou “o apoio inequívoco do BNG á concentración convocada en Burela pola Plataforma en defensa do sector pesqueiro que terá lugar o vindeiro sábado, 6 de abril, ás 12h”.
O Real Decreto, sinala o deputado do BNG, obvia a capacidade de decisión que teñen as Comunidades Autónomas e, no noso caso concreto, a capacidade que posúe a Administración galega sobre o seu territorio e o seu litoral e costa. “Estas alegacións defenden a necesidade de que exista unha coordinación coas CCAA á hora de tomar decisións” asegurou Rego, engadindo que “defendemos que exista un informe previo -preventivo e vinculante- realizado pola Administración autonómica sobre o impacto social e económico que poden ter estes polígonos de eólica mariña nos nosos sectores produtivos, sobre todo o pesqueiro e o complexo mar-industria, así como o grao de afectación ao ecosistemas mariños e o noso litoral”.
Así mesmo, o BNG quere que se cumpra coa normativa galega sobre a instalación das infraestruturas de evacuación, que atravesarán as rías galegas e chegarán a terra, onde se terán que instalar subestacións. “Do mesmo xeito, débense contar coas CCAA para regular o proceso de concorrencia competitiva” insiste Rego.
E engadiu Rego: “Débese garantir o diálogo co sector pesqueiro e marisqueiro nesta fase de exposición pública do Real Decreto co obxectivo de minimizar os impactos negativos, e estabelecer criterios -alén dos económicos- que alcancen ou superen no mínimo 50% da puntuación total para que non sexa só o lucro económico o que determine a adxudicación destes parques neste proceso de concorrencia competitiva”.
Así mesmo, o BNG defende a presenza do Instituto Español de Oceanografía -con dous centros na Galiza- na Comisión de Valoración para que estea presente sempre o criterio científico “á hora de estabelecer a valoración” para achegar a información e o grao de afectación e impacto sobre os ecosistemas mariños e o impacto socioeconómico que terán os proxectos de eólica mariña.



