As alumnas e alumnos da novena edición do Obradoiro de Emprego Tahume, impulsado polos Concellos de Porto do Son e Ribeira para favorecer a empregabilidade das persoas da comarca, traballou os días pasados no acondicionamento das zonas verdes e de lecer das casas da cultura de Xuño e San Pedro de Muro, do Colexio de Educación Infantil e Primaria de Xuño e de EEI de Carballosa.
Os traballos foron desenvolvidos polo alumnado das dúas especialidades da actual edición (a novena) de Tahume: por unha banda Actividades auxiliares en viveiros, xardíns e centros de xardinería e pola outra Actividades auxiliares en conservación e mellora de montes.
Este programa está dirixido a mellorar a ocupabilidade das persoas desempregadas e abordar de xeito efectivo as necesidades de emprego dos ditos municipios do Barbanza.
A maiores do devandito, os días pasados tamén levaron a cabo a limpeza e acondicionamento do parque periurbano de San Roque, en Ribeira, e máis dos accesos á praia de Ornanda, en Portosín.
O alumnado da novena edición de Tahume (20 persoas demandantes de emprego, 10 por cada un dos concellos organizadores) conta coa axuda dun director de obradoiro, dous mestres para ambas especialidades e un titor.
