Gadis presentou este 30 de maio a nova campaña Maio Solidario, que se levará a cabo desde este xoves, 2 de maio, ata o próximo 1 de xuño, nos establecementos que a cadea alimentaria galega ten na xeografía galega e en Castela e León. Con esta edición, cúmprense xa 12 anos desde que a empresa lanzou esta iniciativa solidaria, que se converteu nunha das máis simbólicas do seu programa de Responsabilidade Social Corporativa. Beneficiaranse once bancos de alimentos e participarán 86 Gadis da provincia coruñesa (1 na Pobra, 1 en Boiro, 1 en Muros, 1 en Noia e 2 en Ribeira).
As persoas interesadas en colaborar poden facelo mediante a doazón de alimentos non perecedoiros nos espazos destinados a tal fin nos diferentes puntos de venda ou a través dunha doazón económica no momento de abonar a compra.
En total, son 201 Supermercados Gadis de Galicia e Castela e León os que participan nesta campaña solidaria, que ten como fío condutor o compromiso da empresa coas persoas, as familias e os colectivos en situación de vulnerabilidade.
Os destinatarios serán os bancos de alimentos da Coruña, Ferrol, Santiago (Balrial), Vigo, Lugo, Ourense, Ávila, León, Palencia, Ponferrada, Salamanca, Valladolid e Zamora.
Beneficiados: 800 asociacións e máis de 100.000 persoas
O destino final das axudas son máis de 100.000 persoas que viven en fogares en situación de vulnerabilidade. Unha vez máis, entre os alimentos máis demandados atópanse os legumes, o leite, o arroz, o aceite, as conservas ou os cereais.
