Os concelleiros ribeirenses Francisco Suárez, Fernando Abraldes e Antía Alberte presentaron este luns 1 de abril, xunto a David Sampedro, a primeira Festa da Xuventude de Ribeira que se celebrará o vindeiro venres 12 de abril en Coroso.
Segundo explicou o concelleiro de Festexos, Suárez-Puerta, o evento contará coa presenza do grupo El Combo Dominicano e o DJ Tito Maverick. A cita festiva está organizada por David Sampedro, o Concello e a firma Espectáculos A Cantaruxa. Segundo afirmou o promotor da celebración David Sampedro, o evento comezará as 22:00 horas.
Pola súa banda, a concelleira de Xuventude Antía Alberte reafirmou o compromiso do seu departamento para organizar máis eventos dirixidos á mocidade, contando con artistas e grupos locais. Esta quedada festiva, dixo, “pretende ofrecer un espazo inclusivo e divertido onde os mozos e mozas poidan xuntarse e gozar da música en directo”.
