O Concello de Boiro e a Asociación de Amigos do Camiño de Santiago do Barbanza organizan unha charla e unhas saídas formativas cos centros de ensino do municipio para dar a coñecer o Camiño A Orixe. A concelleira de Cultura e Turismo, María Outeiral; Manuel Antonio Villar, presidente da Asociación, e Marian Treus, secretaria, presentaron na mañá deste martes 30 de abril o programa de actividades.
A finalidade, sinalaron, é “dar a coñecer entre a rapazada dos centros de ensino os nosos recursos históricos, patrimoniais e tamén paisaxísticos”.
Segundo informou a concelleira María Outeiral, “os centros de ensino sempre mostran unha gran acollida coas propostas que facemos dende o Concello de Boiro e estas pequenas andainas vanlle permitir coñecer un recurso co que contamos no noso concello”.
Nas actividades van participar un 156 alumnos e alumnas dos centros de ensino do municipio. O luns 6 de maio ás 10.30 horas na Casa da Cultura de Boiro terá lugar unha charla na que coñecerán a historia das peregrinacións, do Camiño de Santiago e, en concreto, do Camiño A Orixe. “Trátase dunha dobre actividade para promover entre a rapazada o Camiño cunha charla informativa e unhas saídas polo percorrido dentro do termo municipal”, afirmou o sacerdote Manuel Antonio Villar.