A Asociación Saúde Mental A Creba, entidade inclusiva e integradora que traballa nas comarcas de Barbanza e Muros-Noia, vén de realizar unha nova actividade encaixada no Programa de Educación e Saúde Comunitaria na que participaron os centros da Creba. Desta volta, a iniciativa buscou mellorar os coñecementos das persoas usuarias en materia de educación e seguridade viarias, tanto como peóns como en condutores.
A materia tratada espertou un gran interese entre as persoas desta entidade, e entre as cales se atopan varias que teñen permiso de condución de distintos vehículos.
O oficial da Policía Local de Ribeira, José Luis Martínez Chouza, foi o
encargado de impartir esta sesión docente para a que se utilizou a Casa
da Cultura de Carreira, que encaixa coa liña de traballo que está a
levar o corpo municipal, educando e divulgando entre a comunidade
distintos aspectos do seu labor, conseguindo así unha maior formación e
coñecemento entre os distintos colectivos e centros educativos do municipio.
Dende A Creba valoran a colaboración do corpo policial do Concello e xa
se comprometeron a realizar accións similares no futuro e seguir abrindo
liñas de traballo conxuntas.
