A sede da Asociación de Empresarios de Ribeira acolleu este xoves 18 a presentación da nova Campaña do Día da Nai da patronal, unha iniciativa destinada novamente a dinamizar as compras locais e a visualizar, recoñecer e reivindicar o importante (e necesario) compromiso da cidadanía cos negocios de proximidade. Haberá tres premios: un vale de 1.000 euros, 20 entradas para unha clase maxistral de estilismo e catro cestas de compra valoradas en 50 euros cada unha.
Na cita participaron Francisco Martínez Gude, presidente da asociación, Luís Pérez Barral, alcalde de Ribeira, e Vicente Mariño de Bricio, tenente de alcalde. Segundo confirmaron, na nova edición da campaña, que conta coa colaboración do Concello, contarase coa participación de máis de 50 establecementos. A campaña está co-financiada pola Xunta de Galicia.
Tamén explicaron que a promoción realizarase entre as compras e consumicións feitas desde o día 19 de abril ao 5 de maio de 2024. A forma de participar será mercando e consumindo en calquera establecemento socio participante e subindo o tícket a empresariosriveira.com. Os sorteos realizaranse o luns 6 de maio ás 13.00 horas no local da Asociación de Empresarios.
Os premios destas campaña serán:
-Compras por valor de 1.000€ menos a retención dos impostos obrigatorios. Este premio terá que ser gastado un día en concreto a determinar entre a Asociación e a/o premiada/o nos establecementos participantes nesta campaña, como data máxima o 31 de maio de 2024. O importe deste premio consumirase nos tres sectores que participan nesta campaña: comercio, hostalería e restauración (a persoa premiada pode gastar 100€ en cada un dos establecementos elixidos para gastar o vale).
-20 Entradas para unha sesión de masterclass de estilismo.
-Catro cestas da compra valoradas en 50€ cada unha.
