A Capela da Atalaia de Porto do Son acolleu este domingo 19 de marzo a presentación dos actos litúrxicos que se levarán a cabo durante a Semana Santa na vila sonense. Participaron no acto o irmán maior da Confraría da Paixón de Porto do Son, Juan Pérez Pouso, os sacerdotes José Ramón Jorge Marcos e Antonio Vila Brión, o alcalde Luis Oujo Pouso e o catedrático emérito da Universidade de Santiago Agustín Dosil Maceira, que foi o encargado de realizar o pregón este ano. Segundo lembraron, este ano celébrase o vixésimo aniversario da Confraría. No acto tamén compartiron a axenda de actividades da Semana Santa en Porto do Son, que se pode consultar ao detalle a través da web da Confraría.
-Venres 22 de marzo (Venres de Dolores)
Nesta xornada contémplase a figura de María na Paixón, acompañando a Xesús na distancia e sufrinte ao pé da cruz. A misa está prevista para as 20.00 horas. Na igrexa parroquial, misa na honra da Virxe e en memoria dos cofrades falecidos e posterior procesión. Percorrido: rúa da igrexa, avenida de Galicia, rúa Trincherpe e remate na praza de España.
-Domingo 24 de marzo (Domingo de Ramos)
Xornada na que se conmemora o comezo da Semana Santa, coa entrada de Xesús en Xerusalén, que é recibido como rei con cantos, palmas e ramos de oliveira. A reunión na praza de España está prevista para as 10.30, onde se bendicirán os ramos. Ás 11.00 celebrarase a procesión da Borriquita, dende a praza de España e posterior misa na igrexa parroquial. A procesión percorrerá a rúa Trincherpe, a avenida de Galicia, a rúa da Igrexa e con remate na Igrexa Parroquial.
-Martes 26 de marzo (Martes Santo)
Ás 22.00 horas, procesión do Via Crucis, dende a Capela da Atalia. Consiste en 14 escenas da Paixón de Cristo ou estacións, que os fieis percorren ao tempo que oran en sinal de penitencia e arrepentimento. A procesión sairá da Atalaia percorrendo a rúa da Roda, a travesía Moullón, a praza de Rosalía de Castro, Fernando Fariña, praza de España, camiño Novo, rúa Atalia e con remate na Capela.
-Xoves 28 de marzo (Xoves Santo)
Porto do Son conmemora o día no que Xesús celebrouse a Última Cea cos seus apóstolos e instituíu dous sacramentos para a salvación da humanidade: a Eucaristía e a Orde Sacerdotal. Ás 18.00 horas está programada na Igrexa Parroquial a misa e a posterior procesión do Ecce Homo. Percorrerá a rúa da Igrexa, a rúa Castelao, a praza Nova, a praza de España, a rúa Fernando Fariña, a praza de Rosalía de Castro, a travesía Moullón e a rúa da Roda. Remate na Capela da Atalaia.
-Ventres 29 de marzo (Venres Santo)
Porto do Son celebra a Paixón e Morte de Xesús.
10.30. Reunión na praza de España.
11.00. Representación do Santo Encontro (se chove na igrexa parroquial). Procesión dende a praza de España cara Fernando Fariña, praza de Rosalía, travesía Moullón, rúa da Roda e Capela da Atalaia.
18.00. Na Igrexa Parroquial, liturxia, desencravo e posterior procesión do Santo Enterro acompañada da Banda Música Municipal de Brión. O percorrido sairá da Igrexa Parroquial e pasará pola avenida de Galicia e a rúa da Roda. Rematará na Capela da Atalaia.
23.00. Procesión da Soledad, dende a Capela da Atalaia, coa Banda Municipal de Brión. O percorrido é o seguinte: rúa Atalaia, camiño Novo, praza de España, rúa Trincherpe, avenida de Galicia e rúa da Igrexa. Finaliza na Igrexa Parroquial con canto á Virxe e bendición.
-Domingo 31 de marzo (Domingo de Resurrección)
11.00. Dende a Capela da Atalaia, procesión de Xesús Glorioso (acompañada da Banda de Música de Caldas de Reis), encontro de Resurrección na praza de España e posterior misa na Igrexa Parroquial de San Vicente de Noal.
