Un grupo de veciños de Escarabote veñen de xuntar forzas para pedir ao Concello de Boiro que se respecte, na nomenclatura local, o nome actual da vía “estrada rúa do Muelle”. O problema, sinalan, xurdiu cando un grupo de profesionais da pesca, coñecedores do gran labor desempeñado polo pai Joseba no apostolado do mar, solicitaron ao Concello poñer o nome de “pai Joseba” a unha rúa do municipio para honrar a súa memoria. Na súa proposta tamén solicitaron que se cambiase o nome de “rúa do Muelle” por “rúa pai Joseba”. O troco aprobouse no pleno da Corporación do 27 abril de 2023. Porén, a decisión non foi ben recibida por parte da veciñanza da dita vía e así nolo explican: “A pesar de que recoñecemos o gran labor do padre Joseba, rexeitamos o cambio cando hai rúas novas aínda sen nome”. E engaden: “Consideramos que o Goberno municipal precipitouse en tomar esa decisión e coidamos que se debería informar previamente aos veciños da rúa que será obxecto de cambio”.
Recoñecen que xa se entrevistaron co alcalde boirense, José Ramón Romero, e que levaron a cabo unha recollida de sinaturas para que se manteña a nomenclatura actual. A isto unirase unha segunda entrevista co rexedor e no caso que non frutifique a petición elevarán a súa proposta ao pleno da Corporación para que se manteña o nome actual da rúa.
