O salón de actos do Auditorio de Rianxo acollerá o vindeiro sábado 6 de abril a presentación dos libros de poesía Pousos de Natureza e Outra volta de Rodicio, de Ricardo Seixo (autor) e Abraham Vila (ilustrador). Ademais dos autores, intervirán no acto de presentación o escritor Xosé Ramón Branco Buxán, acompañados polo Concelleiro de Educación e Cultura do Concello de Rianxo, Julio Alcalde. A cita dará comezo ás 12.30 horas.
Como dixemos, Ricardo Seixo e Abraham Vila estarán acompañados de Xosé Ramón Branco Buxán, autor do limiar do poemario Outra volta de Rodicio, que presenta destes xeito: “Trátase dunha obra que activa, mediante os seus versos, a nosa conciencia social, adurmiñada baixo o efecto dunha función narcotizante dos medios, que nos agochan acotío unha realidade esmagadora”.
Ricardo Seixo tamén é autor de Ollares… no fondo da retina… na paisaxe dos afectos (2016), Versos noctámbulos (2018), Na república da intimidade (2019), Sinais (2021), Coa luz negada (2021) e Pousos de luz, con deseño e ilustracións de Abraham Vila.
