O Plan Único da Deputación da Coruña vai financiar unha nova fase das obras de humanización da rúa da Capela, en Outes. O Concello vén de publicar a licitación das obras na Plataforma de Contratación do Sector Público, cun orzamento de 103.438 euros financiados ao 100% con fondos do Plan Único (POS+2023).
Segundo informaron Deputación e Concello, as obras darán continuidade ao proxecto de humanización iniciado nesta céntrica rúa, que dá acceso a servizos como o Centro de Saúde, creando e ampliando beirarrúas en ambas marxes, delimitadas con bordo de granito e con baldosa de formigón vibrado granallada, “ofrecendo un espazo máis amplo e seguro para a circulación peonil”, sinalaron.
O proxecto inclúe tamén a renovación da capa de rodaxe da estrada, cunha superficie total de 150 metros cadrados, e dos aparcamentos, previa demolición do pavimento actual.
Inclúese tamén a renovación de servizos, coa canalización subterránea de saneamento e abastecemento de auga, electricidade, telefonía e alumeado, así como a recollida de pluviais.
As empresas interesadas poden presentar as súas ofertas ata o 8 de abril.
Con cargo a este proxecto financiarase tamén obras de pavimentación de dous tramos de 400 e 185 metros do camiño da Grela, en Cando, que incluirá un novo arranco de fochancas, limpeza de gabias e perfilado das mordentes e o tratamento asfáltico para renovar o firme.
