As alumnas participantes no Programa Integrado de Emprego 2023-2024 que o Concello de Boiro leva a cabo coa colaboración dos Concellos de Rianxo e A Pobra remataron un curso de formación en Manipulador de Alimentos e Elaboración de Pezas Cárnicas. As participantes recibiron formación específica en selección, procesado, corte, conservación e preparación de diferentes pezas, así como a identificación dos contaminantes dos alimentos e en aplicar a normativa vixente en seguridade e hixiene co fin de asegurar a cadea e a rastrexabilidade (trazabilidade) alimentaria.
O programa está destinado a 100 mulleres da comarca inscritas como demandantes de emprego que, durante un ano, reciben formación específica e tamén participan en xornadas formativas destinadas a mellorar as súas habilidades para mellorar a empregabilidade e a inserción laboral. A formación deste curso consta de módulos formativos de envasado, acondicionado e embalaxe de produtos alimentarios; sistemas e procesos loxísticos; mercadotecnia en lña; atención ao cliente; preparado de produtos do mar…
Ademais da formación en módulos específicos, o PIE inclúe outras accións transversais como a formación para a mellora da empregabiliade, formación en habilidades sociolaborais, idiomas e novas tecnoloxías, prospección de ofertas ou deseño de currículos, entre outros contidos. Todas as participantes contan cunha bolsa de asistencia de 10 euros/dia e un módulo de prácticas específicas en empresas da comarca.
O Programa Integrado de Emprego 2023/2024 do Concello de Boiro no que colaboran os Concellos da Pobra e Rianxo está subvencionado pola Consellería de Promoción do Emprego e Igualdade da Xunta de Galicia e o Servizo Público de Emprego Estatal.
