O salón de actos do Auditorio de Rianxo vai dar acollida o vindeiro 6 de abril ás 19.30 horas á presentación de A vara de aguillón do artista local R. Losada Romero (Nuco), no marco do programa municipal de actividades Primavera Cultural.
Ademais do propio autor intervirán no acto de presentación os escritores rianxeiros Xesús Rábade Paredes e Xosé Ricardo Losada, acompañados polo concelleiro de Educación e Cultura do Concello de Rianxo, Julio Alcalde.
Robustiano Losada Nuco é un dos máis coñecidos e innovadores escultores da nosa comarca e centra boa parte da súa produción en traballar con pedra, ferro e vidro, tal e como se pode ver na exposición permanente que ten aberta ao público no seu propio domicilio e que podemos ver nos seus detalles, dende a Rede, en Turismo.gal.
A súa obra é moi destacada pola orixinalidade da proposta pero tamén pola proximidade das súas esculturas coa realidade social e cultural da nosa terra e do noso tempo. Boa parte das súas pezas xorden directamente do legado que nos deixaron os grandes escritores rianxeiros.
