O Concello de Rianxo, a través da súa Área de Educación e Cultura, organiza esta primavera unha nova actividade formativa e dinamizadora ao servizo da veciñanza: unha Aula de Canto.
O obxectivo é “fomentar o convivio musical entre as persoas asistentes, creando un espazo de participación cultural e traballo en equipo, mostrando aspectos básicos sobre a voz e a música, que incidan nun mellor autocoñecemento e goce do propio instrumento, así como desenvolver a escoita activa e a interpretación musical en grupo”.
A aula está destinada a persoas maiores de 50 anos, cun máximo 20 participantes.
A encargada de impartir os contidos será a soprano, formadora e divulgadora noiesa Esperanza Mara Filgueira.
O curso desenvolverase os martes 2,16, 23 e 30 de abril; 7, 14, 21 e 28 de maio; 4, 11, 18 e 25 de xuño.
O horario será de 16.00 a 18.00 no Centro Sociocultural-Auditorio (aula do 1º andar). O prazo de matrícula estará aberto até o 28 deste mes ás 14.00 horas. Trátase dunha actividade de balde.
As persoas que precisen máis información poden solicitala nos correos concelloderianxo.gal, cultura@concelloderianxo.gal ou no telf 981 100 688.
