O Concello de Rianxo compartiu a axenda de actos de Semana Santa organizados pola Irmandade da Paixón de Cristo de Rianxo. O programa comezou o 1 de marzo cunha misa solemne na honra de Xesús Nazareno. As actividades continuaron este sábado 16 de marzo, con outra misa solemne e coa imposición de medallas encadrada no programa da Irmandade da Paixón de Cristo. A maiores, os días 20, 21 e 22 de marzo celebrarase o triduo na honra da Nosa Señora dos Dolores (con misa os días 20 e 21, ás 19.00 horas, e misa solemne o día 22, ás 20.00 horas, e con procesión ao rematar o oficio).
O 24 de marzo, Domingo de Ramos, celebrarase ás 11.30 horas a tradicional Procesión de Ramos dende a Igrexa Parroquial até a Capela da Nosa Señora da Guadalupe, onde serán bendicidos os ramos para regresaren logo os fregueses á igrexa parroquial e oficiarse a Santa Misa.
O 27 de marzo, Mércores Santo, haberá dous grandes actos relixiosos: ás 20.00 horas o acto de ánimas e confesións e ás 21.00 horas o Via Crucis penitencial polas rúas de Rianxo.
No 28 de marzo, Xoves Santo, celebrase a Santa Misa da Cea do Señor ás 19.00 horas e ás 21.00 horas a procesión e, ao rematar o percorrido, a celebración da Hora Santa.
As actividades do Venres Santo (29 de marzo) arrincarán ás 10.00 horas co Anuncio do Santo Encontro polas rúas de Rianxo, a cargo da Banda de Tambores da Irmandade da Paixón de Cristo. Ás 11 horas celebrarase o Santo Encontro na praza Castelao, ás 19h os Santos Oficios (Adoración da Cruz e Desencravo) e ás 22.00 a Procesión do Santo Enterro.
O 30 de marzo, Sábado Santo, inclúe ás 21.00 horas a cerimonia da Vixilia Pascual. Ao finalizar, o Cristo da Misericordia volverá á súa capela.
A axenda rematará o Domingo de Resurrección, 31 de marzo, cunha Misa de Resurrección ás 12.15 horas.
Segundo informou a Irmandade, en caso de choiva os actos desenvolverase no interior da Igrexa Parroquial de Rianxo.
O programa vén da man da Irmandade da Paixón de Cristo de Rianxo en colaboración co Concello.
