A Universidade de Santiago e o Concello de Outes achegan este ano 2024 unha nova edición do ciclo formativo universitario para persoas maiores Camiños de Coñecemento e Experiencia. O programa inclúe media ducia de actividades formativas (seminarios, visitas, obradoiros) e para anotarse nelas as persoas interesadas deberán chamar ao Centro Social de Outes (981 850 575 / 637 063 566).
A axenda comeza o 28 de febreiro pola tarde, de 16.30 a 18.00 horas, co seminario Cambio climático ou o que podemos perder. Imparte José Antonio Rodríguez Añón, profesor titular do Departamento de Física Aplicada da Facultade de Físicas da USC, e máis Xurxo Proupín Castiñeiras, profesor titular do Departamento de Física Aplicada da Facultade de Físicas da USC.
As sesións proseguen o 1 de marzo, cunha visita á EDAR de Outes, en horario de 16.30 a 18.00 horas. Os contidos virán novamente da man de José Antonio Rodríguez Añón, profesor titular do Departamento de Física Aplicada da Facultade de Físicas da USC, e máis Xurxo Proupín Castiñeiras, profesor titular do Departamento de Física Aplicada da Facultade de Físicas da USC.
O 5 de marzo continúa a actividade co seminario Plantas medicinais, que se desenvolve en horario de 16.30 a 18.00 horas, da man de María Pilar Riveiro López, docente do Programa Universitario de Maiores (Cuarto Ciclo da USC).
O 6 de marzo desenvolverase un obradoiro práctico de recoñecemento das plantas medicinais máis frecuentes en Galicia, impartido por María Pilar Riveiro López, docente do IV Ciclo da USC. Levarase a cabo en horario de 16.30 a 18.00 horas.
O xoves 7 de marzo celebrarase un novo seminario (Formas de xestionar a nosa esfera patrimonial de cara ao futuro I) en horario de tarde, a partir das 16.30 horas, impartido por Carmen Temperán Isorna, notario do Concello de Outes. A segunda sesión deste seminario sobre patrimonio celebrarase o 14 de marzo.
