Un veciño de Ribeira de 58 anos, foi trasladado ao Hospital do Barbanza tras sufrir unha parada cardiorrespiratoria cando viaxaba nun autobús de liña xunto á súa muller e a outra media ducia de persoas para dirixirse ao referido complexo hospitalario situado no lugar de Salmón, na parroquia ribeirense de Oleiros.
O home xa se atopou mal cando se espertou e levantouse da cama, polo que decidiu acudir ao devandito centro sanitario no transporte público para que o vise un médico. Cando ese autobús estaba a realizar o seu roteiro, ese home chegou a perder a consciencia nun par de ocasións. Ao redor das once e dez da mañá, cando circulaba polo tramo das rotondas de Xarás, o enfermo entrou en parada cardiorrespiratoria e o chofer detivo o vehículo de pasaxeiros nunha parada que hai xunto uns depósitos da auga, e un dos ocupantes dirixiuse ao parque comarcal de Bombeiros de Ribeira para solicitar axuda.
A intervención dos bombeiros e a chegada dunha ambulancia de Soporte Vital Básico de Urxencias Sanitarias de Galicia-061 co equipo médico de Atención Primaria, permitiu á súa evacuación ao Hospital do Barbanza.
