Esta semana a asociación Somos Rianxo presentou a edición 2024 da campaña Namórate de Rianxo, destinada a reivindicar e visualizar o comercio local e máis as vantaxes de facer as compras en clave de proximidade. Na presentación da iniciativa, lanzada coincidindo coa proximidade do 14 de febreiro (Día de San Valentín) participou o alcalde Julián Bustelo, quen destacou “a importancia de apoiar ao noso pequeno comercio coa finalidade de seguir xerando emprego e riqueza no municipio rianxeiro, dando vitalidade ás parroquias e á vila e favorecendo unha atención de calidade e proximidade”.
Entre os premios inclúense unha fin de semana romántica, dous cheques de 100 euros e dúas ceas para dúas persoas. Para optar aos agasallos será preciso selar unha tarxeta da campaña en tres locais distintos e introducila nas caixas de correos colocadas nos espazos do amor antes do 14 de febreiro. De xeito complementario e buscando a participación cidadá tamén haberá agasallos para as persoas que se fagan fotografías nos recantos (photocalls) do amor habilitados polas diferentes parroquias de Rianxo para logo subilas ás redes sociais etiquetando a Somos Rianxo en Facebook e Instagram. Poderán optar a unha estancia nun spa para dúas persoas.
