Este venres 23 de febreiro o Concello de Porto do Son conmemorou o Día de Rosalía de Castro (23-F) coa plantación dunha figueiriña a carón da Casa da Cultura da parroquia de Queiruga. Na homenaxe participaron o alcalde, Luis Oujo, e mailos concelleiros de Cultura e Medio Ambiente e Rural, Alicia Martínez e Juan José Calo.
A figueira, como lembraremos, é unha árbore de forte carga simbólica na obra e na vida da escritora de Padrón. No seu libro de poemas Cantares gallegos, fala con agarimo da súa casa e do seu quintal deste xeito: “Miña terra, miña terra; terra onde meu eu criei; hortiña que quero tanto; figueiriñas que prantei”.
