O equipo do Goberno municipal de Ribeira mantivo unha reunión coa veciñanza da parroquia de Oleiros co propósito de informar das actuacións que o Consistorio está a levar a cabo na parroquia e para recoller todas as inquedanzas que ten a veciñanza en diferentes eidos. Os membros do Executivo informaron de que están próximas ao seu remate as obras de saneamento no lugar de Canabeiro, así como a mellora de accesibilidade e beirarrúas en Gándara.
O equipo de Goberno tamén abordou algunhas actuacións proxectadas para os vindeiros meses na parroquia; como a instalación da rede de saneamento en Lixó, financiada co fondo de compensación ambiental, a pavimentación do camiño dos Muíños; financiada con fondos da Deputación da Coruña, e a construción dos novos vestiarios e cantina no campo de fútbol de Oleiros.
“É necesario seguir ampliando a rede de servizos esenciais cos que conta a parroquia”, afirmou o alcalde Luís Pérez, engadindo que “abordamos o compromiso que adquirimos coa veciñanza de seguir incrementando a rede de saneamento e auga para consumo; así como a mellora da pavimentación das estradas na parroquia”.
A veciñanza trasladou ao equipo de Goberno a necesidade de acometer varias actuacións, como a mellora da sinalización e o mantemento do río Artes (Sanchanás), ou a mellora do parque infantil dos Muíños. No encontro tamén se abordou a necesidade de mellorar o estacionamento do Hospital do Barbanza; e nese sentido, o Goberno local comprometeuse a trasladarlla ás administracións competentes na materia para “que poidan chegar a un acordo coa comunidade de montes e habilitar estacionamentos gratuítos e ben asfaltados para esa infraestrutura básica emprazada na parroquia de Oleiros.
Outro dos temas abordados na reunión foi a implementación de melloras na accesibilidade e a seguranza viaria coa dotación de beirarrúas, o calmado de tráfico, ou “a pavimentación de diversas rúas na parroquia que precisan un mantemento axeitado despois de anos sen ningún tipo de actuación”, concluíu o rexedor Pérez Barral.
