O Concello de Rianxo activou estes días o Plan de Compostaxe Municipal, fíxoo coa posta en funcionamento dos cinco centros de compostaxe comunitarios localizados en diferentes puntos da vila e a súa contorna: na rúa Arrabal (Tanxil), na rúa Arcos Moldes, na Urbanización A Martela, no Pavillón José Manuel Abuín e na Urbanización Pazo de Rianxiño. O Goberno local acompañou esta actividade dun convite á cidadanía a participar e beneficiarse destes centros. Así, quen queira achegar a súa colaboración pode chamar ao 981 86 08 08 a partir do vindeiro luns 12 de febreiro. Recibirá un caldeiro para facilitar a separación dos residuos na casa.
A esta acción engadirase o reparto de composteiros individuais (dos cales xa se entregaron case medio cento) que continuará nas vindeiras semanas a medida que se vaia dispoñendo de máis.
O compost que se produza nos centros comunitarios será para a veciñanza que participe no plan e no seu caso para a mellora dos xardíns municipais.
