As e os participantes no Obradoiro de Emprego Tahume IX, posto en marcha polos Concellos de Porto do Son e Ribeira para mellorar a formación especializada e favorecer a inserción laboral das persoas desempregadas dos ditos municipios, comezaron estes días o seu período de prácticas sobre o terreo nas especialidades de Actividades auxiliares en viveiros, xardíns e centros de xardinería e Actividades auxiliares en conservación e mellora de montes, que son os dous eixes formativos que vertebran esta novena edición do obradoiro.
O alumnado de Tahume (20 persoas demandantes de emprego, 10 por cada un dos concellos organizadores) conta coa axuda dun director de obradoiro, dous mestres para ambas especialidades e un titor. Os días pasados, para completar a súa formación, visitaron a sede de AMBAR en Frións (Ribeira), onde foron recibidos polo voluntario da entidade e experto en agricultura ecolóxica Manolo González, que lles mostrou o traballo que se está a levar a cabo no invernadoiro da asociación inclusiva.
