Este venres 16 de febreiro a sede en Ribeira (Frións) do Centro de Recursos da Asociación AMBAR das Persoas con Diversidade Funcional recibiu a visita de José Ramón Romero, alcalde de Boiro, acompañado de Raúl Romero Treus, concelleiro de Política Social e máis de Lidia Sueiro e Tania Rey, traballadoras sociais do Concello de Boiro. Durante a súa estadía no centro de Frións estiveron acompañados por Milagros Rey, presidenta da asociación inclusiva da nosa comarca, Alicia Romero, secretaria de AMBAR e Helena Teira, coordinadora da asociación.
Tiveron oportunidade de coñecer as instalacións do Centro de Recursos e os diversos obradoiros e servizos que se levan a cabo dende a entidade, como por exemplo o obradoiro de habilidades instrumentais, o de cestería, obradoiro de arte, artesanía, o grupo de artes escénicas e a Formación de Forestais que se está impartindo actualmente no centro.
As persoas usuarias de Ambar encargáronse de explicarlles o traballo que realizan en cada un dos obradoiros e compartiron todo sobre os seus proxectos co equipo do Goberno do Concello de Boiro.
Concello colaborador
O Concello de Boiro colabora coa asociación en programas para levar a cabo actividades e tamén desprazamentos.
Durante a súa estadía, o alcalde, José Ramón Romero, felicitou á asociación polo “gran traballo que fan” e as súas propostas “realizando actividades en función dos gustos e das habilidades de cada un, adaptándose ás preferencias de cada persoa fomentando a súa autonomía persoal”.
E engadiu o rexedor: “O compromiso das asociacións é fundamental para que entidades como AMBAR poidan desenvolver os seus proxectos que repercuten directamente no benestar das persoas e dende o Concello de Boiro imos seguir traballando nese sentido”.
A Asociación Ambar promove iniciativas e actividades na comunidade, fomentando a autonomía persoal e o apoderamento de persoas con diversidade funcional. Realizan actividades e proxectos que promoven a participación e a inclusión social das persoas con diversidade funcional.
