Vilmente asasinados dous gardas civís en Barbate, por parte duns narcotraficantes. Impunidade e falta de humanidade, por parte dunha gentuza que non pensa máis que no diñeiro.
En Galicia, sabemos ben o que significou o narcotráfico. Decenas de nais valentes souberon estar á altura das circunstancias para denunciar o que todo o mundo coñecía e miraban para outro lado. Chegaron uns xuíces valentes e unhas forzas de seguridade, con medios humanos e materiais suficientes, para desarticular unha numerosa cantidade de carteis do narcotráfico galego.
Mozos enganchados, moitos deles falecidos ou ben deambulando, diariamente, polas rúas dos pobos de Arousa. Corrupción política, policial e empresarial. Mafiosos sen escrúpulos. Son algunhas das consecuencias da secuela da droga e do narcotráfico en Arousa.
Demasiados negocios particulares, empresas inmobiliarias, construtoras, pesqueiras e responsábeis políticos fixéronse millonarios co diñeiro manchado de sangue.
En Arousa, ao principio o silencio cómplice era o máis seguro e conveniente, para logo pasarse á acción e á denuncia pública e xudicial. Do tabaco á droga é o que pasou en Galicia e continúa ocorrendo, así como noutros lugares de España, de Europa e do mundo.
