Este luns 5 de febreiro a asociación inclusiva AMBAR puxo en marcha na sede de Frións (Ribeira) a súa formación en Actividades Forestais e Conservación e Mellora de Montes, dirixida a persoas con diversidade funcional. Segundo informou a asociación da nosa comarca, aínda quedan dúas prazas dispoñíbeis para este curso, polo que as persoas interesadas aínda poden inscribirse a través do formulario de inscrición ou chamando ao 673 879 034. Os requisitos para realizar a formación son ter unha diversidade igual ou superior ao 33%, estar inscrito no Servizo Público de Emprego e aportar a acreditación de demanda de emprego (DARDE) en vigor.
Este luns, para dar o inicio á formación estiveron presentes Daniel Tojo, orientador laboral; Milagros Rey, presidenta de AMBAR; Jessica Estévez , coordinadora da formación e Alicia Romero, secretaria da Asociación AMBAR.
Este curso realízase co apoio financeiro da Fundación ONCE a través da Convocatoria de Axudas Económicas para a Selección de Operacións para o Reforzo da Empregabilidade para Persoas con Discapacidade “Uno a Uno” Programa FSE+ de Inclusión – Ano 2023-2024.
Desenvolverase no marco do Programa de Inclusión Social, Garantía Infantil e Loita contra a Pobreza FSE+ 2021-2027 (Programa FSE+ de Inclusión) do Fondo Social Europeo (FSE), en concreto co Obxectivo Político 4, Obxectivo Específico h), establecido no Artigo 4 do Regulamento (UE) 1296/2013, relativo a “Fomentar a inclusión activa ó obxecto de promover a igualdade de oportunidades, a non discriminación e a participación, e mellorar a empregabilidade, en particular para os grupos desfavorecidos”.
