Ao igual que o pasado ano, neste 2024 a Asociación de Veciños Fontenova de Lampón e a Asociación Cultural Pedra da Aroña veñen de xuntar forzas para organizar unha das celebracións máis especiais para a veciñanza de Lampón, o Enterro do Felipiño, co que se despide o Entroido na parroquia.
O programa de actividades foi desenvolvido en colaboración co Concello de Boiro.
Será os días sábado 17 e domingo 18 de febreiro. O sábado celebrarase a Festa do Entroido a partir das 12:30 horas na Unitaria da Estrada Principal, na que haberá callos, empanada e doces típicos do Entroido.
Arredor das 16:30 horas, sairá a comitiva fúnebre co Felipiño, para realizar unha ruada polos bares e rúas da parroquia “ata que o corpo aguante”, en palabras das ditas asociacións.
O Domingo de Piñata será a despedida final, cun percorrido pequeno co Tren dos Enterros a partir das 18:00 horas (dende o peirao de Escarabote e incluíndo un paseo pola vila carrexando o Feliiño) e a posterior queima do Felipiño. Rematará a cerimonia co responso e coa queima do boneco.