Axentes da Policía Nacional adscritos á Comisaría Local de Ribeira, no marco dun dispositivo establecido para a prevención do tráfico e consumo de estupefacientes na vía pública, procederon á detención de dous homes como “presuntos autores dun delito contra a saúde pública”, na súa modalidade de tráfico de drogas, realizadas no marco de dous operativos diferentes.
No primeiro operativo, os axentes sorprenderon in fraganti a un home, mentres estaba a realizar unha venda de droga a un consumidor que lle pagou cun billete de dez euros. Posteriormente, fóronlle localizadas entre os seus efectos, 9 bolsiñas de cocaína e heroína, preparadas para a súa venda, polo que se procedeu á súa detención.
Nun segundo operativo, é identificado outro varón, ao que se lle atopa entre as súas pertenzas un frasco que contiña 24 bolsiñas de cocaína e heroína, predestinadas para o tráfico, así como 400 euros en billetes de diverso valor, polo que foi detido como presunto autor dun delito de tráfico de drogas.
Tras tramitarse as correspondentes dilixencias policiais, os detidos foron postos ao dispor do Xulgado de Instrución número Tres de Ribeira en funcións de garda.
