O Concello de Boiro vén de facer balance da actividade desenvolvida en 2023 pola súa Oficina de Información ao Consumidor, que presta servizo ás persoas consumidoras e usuarias para o adecuado exercicio dos seus dereitos. No ano que deixamos atrás, a OMIC de Boiro atendeu un total de 2.373 visitas.
No balance faise saber que o total de persoas atendidas polo persoal municipal de consumo xerou ata 578 expedientes novos. A maior parte das consultas rexistradas correspóndense con temas de electricidade, comunicacións, transporte aéreo, seguros, banca e servizos financeiros, seguros ou comercio electrónico.
Ademais de informar e orientar aos consumidores, a OMIC remite as reclamacións das persoas consumidoras aos organismos competentes; elabora escritos xudiciais e extraxudiciais; ou realizar mediacións entre persoas consumidoras e empresas. Neste eido, realizáronse 49 mediacións satisfactorias onde a empresa e a persoa consumidora chegaron a acordo nun prazo máximo dun mes sen acudir a outros mecanismos de resolución de conflito.
A Oficina de Atención ao Consumidor do Concello de Boiro está situada no andar baixo da Casa Consistorial de Boiro e presta servizo de luns a venres en horario de 9.00 a 13.30 horas. Pode solicitarse a cita previa mediante a páxina web do Concello de Boiro (www.boiro.gal).
