A Marea de Noia emitiu un comunicado no que insta ao Executivo de Santiago Freire “a desatascar a obra da Praza de Abastos”. Segundo advirte a agrupación, o tempo para retomar este proxecto vai rematando e na vindeira sesión plenaria deste xoves o grupo de Goberno debera “presentar unha proposta seria para solucionar os problemas da obra”. En caso contrario, din, “denunciaremos a licitación ante a Xunta Consultiva de Contratación”.
A Marea xustifica a cuestión en que “non se cumpre cos prazos de licitación” e en “que o trámite do expediente está cheo de irregularidades”.
A Marea indica ademais que “o prazo que tiña a empresa para a execución da obra era de 13 meses e xa van alá máis de dous anos”. Aseguran que “ este prazo xa se cumpriu con creces xa que a formalización do contrato levouse a cabo o 17/01/2022”. E engaden: “Esta falta de cumprimento dos trámites supón que as persoas titulares dos postos da praza sufran serios prexuízos en canto as súas ventas e que se van alongando no tempo”.
A Marea indica tamén que “ en decembro do ano 2022 solicitamos copia do expediente porque houbo informes fiscais do Concello que poñían de manifesto serias irregularidades na tramitación do obra, incumpríndose a lei non nos facilitaron a documentación ate febreiro do ano 2023”. Logo de analizar en profundidade o expediente, engaden, “detectamos varias irregularidades e pago de facturas con incrementos moi importantes nos prezos, cuestión prohibida expresamente no contrato entre a empresa e o Concello o prohibe”.
Dende A Marea insisten en que esta situación “non se pode demorar máis” e que “tanto usuarios como persoas titulares dos postos están fartos dos adiamentos da obra froito da mala xestión da alcaldía”.
