O Auditorio de Rianxo vai acoller o vindeiro 15 de marzo un espectáculo de teatro familiar (para crianzas a partir de 3 anos), Confi, O Golfiño Manoliño, que relata a loita pola supervivencia do golfiño galego do mesmo nome, que é un vello coñecido da nosa xente do mar. A cita, que vén da man da Xanela do Maxín, comezará ás 18.00 horas do día 15 e terá unha duración de preto dunha hora. A cita será de balde ata completar capacidade, coa retirada de convites dende unha hora antes do comezo da función na billeteira do Auditorio
Argumento
Coa misión de difundir a defensa do medio ambiente, Confi, O Golfiño Manoliño é un espectáculo de teatro documento que narra os feitos reais da loita pola supervivencia do golfiño do mesmo nome.
Baséase na historia do arroás que frecuenta as praias da ría de Muros e Noia, ofrecendo unha visión ampla do tema e concienciando sobre a importancia do coidado do medio mariño e da vida salvaxe.
A obra combina o traballo actoral, cos monicreques e proxeccións e, céntrase na conservación e o medio ambiente. “Confi brinda a oportunidade de aumentar a concienciación, sensibilizar sobre o tema e marcar a diferenza”, sinalan dende A Xanela do Maxín.
