O alcalde de Ribeira, Luís Pérez, e a concelleira de Cultura, Antía Alberte, visitaron a Academia de Informática Mega Ribeira con motivo da súa participación o vindeiro sábado 2 de marzo na X edición da First Lego League Galicia. Este torneo internacional, organizado en Galicia pola Universidade da Coruña, a través do Campus Industrial e a Escola Politécnica Superior de Educación de Ferrol, é un concurso educativo que reúne a nenos e mozos de entre 6 e 16 anos. Durante o evento, os participantes fusionan tecnoloxía, ciencia e espírito deportivo ao construír e programar robots utilizando pezas LEGO e resolver retos temáticos.
O obxectivo principal da First Lego League é promover as vocacións tecnolóxicas e científicas entre os mozos. Os valores tamén xogan un papel fundamental, incluíndo competencia amistosa, respecto aos demais, traballo en equipo, inclusión e innovación. Os xuíces do evento avalían tanto o rendemento técnico como a adhesión a estes valores.
A Academia Mega Ribeira ten unha destacada participación neste torneo, acumulando 6 anos de experiencia e gañando varios trofeos en distintas categorías.
“É unha honra ver como a mocidade do Concello de Ribeira se está a esforzar para acadar as mellores puntuacións neste concurso, e que ademáis están a adicar o seu tempo libre a aprender cuestións relacionadas coa programación e incluso co desenvolvemento de aplicacións que permiten controlar robots a distancia” explicou o alcalde Luís Pérez.
