A pesar das intensas choivas e refachos de vento que deixou a borrasca Karlotta na comarca, o líder do PP, Alberto Núñez Feijóo, percorreu diferentes negocios de Muros, para sorpresa dos veciños que se cruzaron con el.
Estivo acompañado pola portavoz do PP muradán, Inés Monteagudo, que agradeceu enormemente a visita: «Demostrou que é unha persoa de palabra», xa que a finais de ano pasado comprometeuse a visitala vila murada durante a campaña electoral autonómica.
Despois do seu paso por Muros, Feijoo aproveitou o seu paso pola zona para dirixirse a Mazaricos, onde mantivo un encontro con gandeiros e tomou nota das demandas do sector. O dirixente popular recolleu as preocupacións dos gandeiros sobre cuestións como a problemática do lobo, os custos de produción ou a alta fiscalidade ambiental imposta polo Goberno.
